真係唔明波叔用意。評論市場利率係好正常嘅事，但評論P就好唔同。因為P唔係市場利率，而係個別銀行嘅「商業決定」。以波叔身份，公開講到「本港銀行隨之而上調最優惠利率的機會極高」咁盡，如果我係銀行，唔知你係咪畀緊說話我聽，真係好大壓力！難怪蘋果今日報導，話有分析指9月是否加P已不再純屬商業決定。
我相信波叔係無心嘅，但作為財爺佢應該做好個人風險管理。2008年Paul Tucker被指暗示Bob Diamond搞搞LIBOR，結果一身蟻。雖然P唔同LIBOR，但都係好多金融合約的利率基準，千奇唔好畀人覺得有人想搞個P。依家波叔好似打開口牌咁樣，畀人話你「undue influence」銀行就無謂啦。
波叔仲要諗諗競爭條例嘅第一行為守則。銀行本應各有各做決定，但如果誤會阿公吹雞，搞到大家行為步伐一致，咁會否被誤會係「反競爭的協議、經協調做法及決定」？
其實銀行加唔加P本來無所謂，加儲蓄存款利率係好事，我都好歡迎。但依家觀感上就好似政府好想銀行加息，幫手壓抑個樓市。希望波叔考慮一下澄清立場，說明P係由銀行按自己嘅情況自行決定。
Search